[size=21]الحلقة
[size=21]السابعة
السلام عليكم ورحمة الله وبركاته





النهاردة بإذن الله سبحانه وتعالى هنتكلم عن أخطر لحظة فى حياتك وحياة البشرية كلها ،
هنتكلم عن اخطر حدث فى حياة الكرة الارضية كلها



هنتكلم من اول ما النبى طلع الجبل لحد ما النبى نزل من على الجبل

ازاى النبى وسط حلف الفضول والحرب والسفر والتجارة وخديجة وأولاده وعلاقاته وازاي وسط الدنيا دى كلها يسيب الدنيا ويطلع على الجبل !

ايه اللى طلعه ما حدش سأل نفسه ازاي

ده كان فى مجتمع كله شرك ما فيش فيه عبادة ما حدش بيقول له اعبد ربنا

لكن لما ربنا يريد قلب انسان بيجيبه ..

أول حاجة تهز قلب النبى عليه الصلاة والسلام إنى لاعلم حجراً كان يسلم علي فى مكة

وهو ماشي مرة رايح فى سفر فى تجارة فى أى مكان وهو فى مكان لوحده

فجأة يسمع : السلام عليك يا محمد السلام عليك يا محمد ..

مين اللى عارفنى هنا ، هو مين اللى بيكلمنى دا ما فيش بشر أصلاً .. الصوت جاى من ناحية حجر

فالنبى صلى الله عليه وسلم يسأل نفسه : معقوله حجر ينطق ويتكلم علشانى أنا ويكلمنى انا ؟!

تانى حاجة تهز قلب النبى عليه الصلاة والسلام لما يبدأ ينام يشوف رؤية يصحى الصبح تتحقق !

يبدأ الزلزالين دول يهزوا قلب النبى ويبدأوا يغيروه ويبدأ حب الله الله يتفجر فى قلب النبي ،

بعد كدة النبى صلى الله عليه وسلم يبدأ يمشى ويبعد عن مكه ويفضل ماشى 15 كيلو..

لغاية ما يلاقى نفسه قدام جبل .. يفضل طالع على الجبل ساعة ونص

لغاية ما يلاقى فى الاخر غار صغير يا دوبك يكفيه هو عليه الصلاة والسلام

النبى ما كانش عارف وقتها ان الغار ده هو اللى الله اصطفاه

لاول مرة هينزل فيه كلام الله القران على الارض كلها ..

إشمعنا الجبل ..؟

الجبل تقدر تشوف السماء مفتوحة من فوقك .. تشوف عظمة وملكوت الله فى التدبر

ومن تحت تشوف الناس أد النقط .. يحتقر قلبك الدنيا واللى فيها ..

اللى جرب قبل كدة يصلى على جبل عارف يعنى ايه الصلاة على جبل ويعنى أيه التدبر على جبل ..

إشمعنا غار حراء .. ؟ لانه يقدر يشوف الكعبة منه لانه عالى جداً

ولان غار حراء ما فيش طرق تجارة من تحته كانت الدنيا مهجورة

وعشان يبقى فى خلوة تامه مع الله سبحانه وتعالى .. ويبدأ يتفجر معانى حب الله فى قلب النبى جوا

الغار الصغير الصخرى ده وفى عز الليل وفوق الجبل يبدأ النبى يبص للسما

ويزيد فى قلبه عظمة الخالق مع نجوم السماء فى الصحراء فى الليل

ويبدأ حب الله يزيد والانس بالله يزيد وتعظيم الله يزيد لدرجة إنه بقى ينزل يجيب زاده ويطلع تانى عليه الصلاة والسلام ..

ماعادش فى حاجة من الدنيا بترجعه ولا تعطله عن حب ربنا ،

فى انسان حب ربنا لدرجة انه عاش على جبل عشان يعبده .. ؟

و اخر مرة يطلع فيها على الغار اخر مرة قبل البعثة وكان فى شهر رمضان

يقعد شهر كامل على غار حراء وليلة 25 رمضان وسط الليل الرهيب

وسط ليله فى اخر الشهر العربى مفيش قمر ظلام دامس ظلام رهيب

ورسول الله بيبص فى النجوم ويتدبر فى السماء ييجى الوقت الموعود

يصدر الامر من الله لجبريل من فوق سبع سماوات انه ينزل من سبع سماوات لمحمد بن عبد الله

بعد 600 سنه من رفع سيدنا عيسى عليه السلام

اول مرة وحى ربنا ونور ربنا ينزل للارض تانى .. والنبى عليه الصلاة والسلام قاعد فى قمة السكينه

وفجأة يسمع الرسول عليه الصلاة والسلام صوت الصوت ده جه منين ما فيش حد معايا خالص !

ويشوف نور يفضل يطلع وبيقوله يا محمد يا محمد

أنا أنا مين اللى عارف اسمى هنا .. ؟

مين اللى عارفنى هنا اصلاً ولاول مرة يبقى محمد أمام جبريل عليه الصلاة والسلام

ويسمع صوت جبريل وهو بيقول أقرأ ...

إقرأ أنا عمرى ما قريت انا عمرى ما أعرف أقرا .. ما انا بقارئ ..!

ويمسكه جبريل ويضمه يضمه يضمه ويضغط على صدره لغاية ماعادش قادر ياخد نفسه

ويسيبه جبريل والنبى عليه الصلاة والسلام بينهج من كتر الاجهاد

يرجع جبريل يقول له إقرأ أقرأ .. ما انا بقارئ انا ما بعرفش أقرا ويرجع تانى يضمه تانى

ويتكرر الموقف أكتر من مرة ثم يرسله .. ولاول مرة يتقرى القرأن على وجه الارض

أقرأ باسم ربك الذى خلق خلق الانسان من علق اقرا وربك الاكرم الذى علم بالقلم علم الانسان ما لم يعلم

وينتهى اللقاء ويصعد جبريل ويسود السكون تانى

ويقعد النبى عليه الصلاة والسلام مش عارف ايه اللى حصل

كيانه بيتزلزل من جواه ايه الكلام اللى انا سمعته ده

يا جماعة عمر النبى على الارض 3 دقايق

لسه عمر دعوة محمد دقايق ..

ليه جبريل يغطي رسول الله ليه الضمه دي

ليه البداية الصعبة دى ..

- كأن ربنا بيقول له من الاول هى دى البدايه يا محمد وهو ده الطريق يا محمد

لازم تعرف انه هو ده الطريق .. لازم تستحمل لازم تصبر

لازم تعرف ان الطريق كدة وتستحمل يا محمد الطريق كله كده

ليه الغطة دي ..؟

جبريل هو نفسه من 35 سنه نزل وشق صدر النبى

النهاردة جاى يضم قلب النبى عشان قلبه يطلع اطهر قلب

لازم قلبه كان يتعصر لازم صدر كل واحد مننا يتعصر

ينزل منه أى دنيا عشان القران لما ينزل على قلبه

ينزل على قلب خالى

كان لازم قبل ما يقول له الخمس ايات

يفضى صدره من اى شئ فى الدنيا عشان كلام ربنا ينزل على قلب سليم 100%

طب ليه 3 غطات طب ليه 3 مرات ..؟؟

كأن ربنا بيقول له يا محمد انت فى فترة الازمة

هيعدى عليك 3 مرات هتبقى كأنك هتتخنق

هتعيش فى جو خانق هتمر بـ 3 ازمات خانقة رهيبه فى حياتك

وبعد كدة الفجر هييجى ...

أول ازمة : شعب أبى طالب لما هتاكل انت وولادك ومراتك ورق الشجر ..

تانى أزمة يا محمد عام الحزن لما هتموت خديجة

ويموت أبو طالب وتنطرد من مكه وتروح الطائف

ويدمو رجليك من الطائف ويحاولوا يقتلوك عند الحرم ..

تالت غطة يا محمد لما هيقفلوا عليك سكك الدعوة

وتُطرد من مكه وتخرج مهاجر للمدينة

ودى هتبقى اخر غطة واخر ازمة هيبقى بعدها الفرج والفتح والتمكين ..

يا محمد الفتح مش هييجى الا بعد أزمات وبعد شدائد

وينزل رسول الله صلى الله عليه وسلم ينزل وهو بيرتجف

وبيرتعش .. يجرى على خديجة بيرتعش

تفتح الباب يقعد يرتجف ويقول زملونى زملونى

والحبيب كل ذرة فيه بترتعش زملونى مش قادر ينطق

بعد فترة يهدأ يحكى لخديجة الى حصل

ويا لها من زوجه قالتله : كلا والله لا يخذيك الله أبدا ..

إنك لتصل الرحم .. وتطعم المسكين .. وتحمل الكل ..

وتكسب المعدوميا محمد .. ما قالتاوش انت لتتحنث فى الغار !

لا قالتله انت انسان عايش عشان غيرك .. حياتك كلها لغيرك

كل همومك هى هموم غيرك لو ربنا اختار نبى هيختار مين غيرك ..

خديجه اول واحدة قالت لا إله الا الله .. محمد رسول الله صلى الله عليه وسلم ..

هذه المرأة العظيمه اللى كان ليها الدور العظيم ..

وتاخد النبى عليه الصلاة والسلام ويطلعوا على ورقه بن نوفل ..

الراجل العجوز 90 سنه الى اختار على الاوثان دين النصرانية ..

وقاعد على التوراة والانجيل طول عمره ..

لما النبى يقص عليه اللى حصل والوصف اللى شافه وأول ما يقوله الخمس ايات الى نزلوا عليه ..

يصرخ ورقة بن نوفل : انه الناموس يا محمد ده جبريل

ده الملك اللى بينزل بالمعجزات والكتب السماويه على الانبياء

يا محمد انت نبى انت رسول من عند الله

انت اللى ربنا اختارك من وسط الارض دى كلها عشان تبقى رسوله ..

خمس ايات يا أمة محمد كل ايه فيهم قلبت كيان ورقة بن نوفل

وقلبت كيان الناس احنا دلوقتي معانا 6236 آيه ولسه زى ما احنا ..!

سيدنا ورقه بن نوفل اول من صدق برسول الله

يبدأ يهتف : يا ليتنى كنت فيها جمعاً اذ يخرجك قومك ..

ياريتنى ارجع لشبابى تانى ليه ؟؟

لا عشان انصرك اذ ينصرك الله لأ اذ يخرجك قومك

النبى قال له أومخرجي هم ..؟

هم حبايبى هيطردوني ..؟ ابو لهب عمى هيطردنى ..؟

انا ابو الحكم اللى بقى لبو جهل بعد كده هيأذينى ؟

يقوله : ما جاء أحد بمثل ما جئت به الا عودي ..

ايام ويموت ورقة ابن نوفل ويفضل النبى في صراع نفسي..

يطلع على الغار يستناه ما جاش تانى يوم ..

ما جاش تالت يوم ولا رابع يوم ..!

ينزل النبى يمشى فى شوارع مكة وسط الناس

النبى عليه الصلاة والسلام فى صراع رهيب

هو فين وما جاش ليه .. وهو ماشى يسمع فجأة نفس الصوت اللى سمعه وهو فى الغار : يا محمد

نفس الصوت اللى انا سمعته قبل كده .. يبص قدامه ما فيش حد يمين شمال يبص وراه ما فيش حد .. !

الصوت جاى منين يا محمد يبص فوق يلاقى جبريل على كرسي فى السماء وهو بيكلم رسول الله صلى الله عليه وسلم

الرسول يبص يترعب يرتجف قلب النبى تانى

يجرى النبى وهو بيرتجف بكل ذرة فى كيانه لبيت خديجه

دثرونى دثرونى بسرعه هاتوا كل الأغطيه اللى عندكوا فى البيت ولفونى فيها دثرونى دثرونى

ولأول مرة وهو فى وسط الانفعال الرهيب ده

يفأجأ ان جبريل جاله بيته عشان يقول له

- مضى عهد النوم يا محمد .. مضى عهد التزمل يا محمد

مضى عهد التدثر يا رسول الله .. وينزل قول الله

" يا أيها المدثر قم فأنذر "

ورسول الله متدثر ويسمع الايات وهو تحت الدثار ..

اول مرة يتكلف بالمهمة دى ..


ويتنفض قلب رسول الله نفضه يتنفض منها كل شئ فى جسمه ..

ينفض الدثار من عليه ويقوم رسول الله صلى الله عليه وسلم فى عنيه نظرة اصرار وعلى وشه ملامح ثبات ..

خديجه تقول له إلى اين يا رسول الله .. ؟

أول مرة بشر يقول له يا رسول الله

- خلاص مضى عهد النوم يا خديجة ..

من النهاردة البشريه ظلماتها هتبدأ تتبدد وتبقى نور..

خلاص بُعث رسول الله صلى الله عليه وسلم متخيل احساس الرسول وهو أول مرة خارج من بيت خديجة ..

أول مرة يبص للدنيا بعين اللى هيغير وهيصلح كل ده انا مطلوب منى ان انا اصلحه ..!

كانت مهمة محمد بن عبد الله انه يطلع للبشر ان كل ده غلط

ان الدنيا دى كلها غلط ولازم تتبنى من جديد على توحيد الله سبحانه وتعالى ..



أخيراً جيت يا رسول الله .. الكون كله مشتاق ليك يا رسول الله

كل شئ مشتاق لك يا حبيب الله وييجى رسول الله ويبعث حبيب الله عليه الصلاة والسلام